Na prěnim posedźenju Njeswačanskeje gmejnskeje rady po lěćnej přestawce su radźićeljo wutoru wuradźowali, kak hasy w Dobrošicach přichodnje pomjenować. To je trjeba, zo móže so wuchowanska słužba lěpje orientować.

Njeswačidło (CS/SN). Dobroščenjo běchu mjena za hasy hižo namjetowali. Tak měl­i dróhi a puće Při hrodowym haće, Li­pa­, Křižerski puć, Dobroščanska hłowna dróha, K staremu młynej, Janska a Cyrkwinski puć rěkać. Radźićeljo pak mějachu wobmyslenja, zo móhło „Při hrodowym haće“ k zaměnjenju w Njeswačidle wjesć. Pola „Lipy“ wustajichu, zo je mjeno překrótke. Namjety chcedźa na jednej z přichodnych gmejnskich radow wothłosować. Wobydlerjo móža dale swoje namjety dawać. Hdyž wšo derje poběži, móhli Dobroščenjo k 1. septembrej 2019 taflički z nowymi mjenami dróhow připrawjene měć: němsce a serbsce w jenakej wulkosći popisane.