Malešecy (SN/at). 120 zajimcow wobdźěli so wčera na informaciskim zarjadowanju w Malešanskim „Wódnym mužu“, hdźež rozjimachu poćeženje wobydlerjow přez Plusnikečansku skału. Přeprošenje wjesnjanosty Matthiasa Seidela (CDU) sćěhowachu zastupjerjo wobydlerskeje iniciatiwy, předewzaća ProStein a jeho planowanskeho běrowa, Sakskeho wyšeho hórnistwoweho zarjada Freiberg a Budyskeho krajnoradneho zarjada. We wěcownej rozmołwje tematizowachu wjesnjenjo mjez druhim poćeženje z haru a prochom. Nastupajo haru připowědźi jednaćel ProStein Jens Gerisch, zo njebudu wot oktobra w nocy hižo žadyn zornowc łamać, „chibazo su wulke nadawki“. Wjesnjenjo starosća so wosebje drobneho procha dla. Tak žada sej wyši hórniski zarjad nětko prochowu koncepciju wot předewzaća ProStein. Tajka pak njeje wuměnjenje za předstejacy rozsud nastupajo přizwolenje, dwě nasypnišći rozšěrić, kaž bě słyšeć. To zbudźi njezrozumjenje na žurli. Zastupjer Freibergskeho zarjada přija zběrku 460 podpismow, w kotrejž žadaja sej produkciju w skale přetorhnyć, doniž njeje kompromisa.