Do přetwara Chróšćanskeje šule wšitko z łubje wurumowali
Chrósćicy (SN/MWj). Kaž wulět do blišich stawiznow běchu čaporowe wiki, kotrež su wčera dopołdnja tójšto ludźi do bywšeje Chróšćanskeje srjedźneje šule přiwabili. Tam organizowachu druhi raz čaporowe wiki, na kotrež běchu najwšelakoriše wučbne srědki za cyle tuni pjenjez na předań. Mjez wopytowarjemi běchu bywši šulerjo a wučerjo runje tak kaž zajimcy z druhich kónčin.
Hižo w prěnjej rumnosći bě wjele widźeć, předewšěm technika, mjeztym runjewon historiska. Tam stejachu mnohim znate polyluxy, jich předchadnik pentascop, projektory za swětłowobrazy, měrjenske nastroje z wučby fyziki, wutykane ptaki a samo mechaniski kopěrowak z dawnych časow NDR. Dale poskićachu cyłe rjadowniske sadźby knihow „Mokrowčenjo“, „Rebel Jan Cuška“, „Hronow“ a dalše. W přichodnej rumnosći ležachu njeličomne nasćěnowe karty, mjez druhim jedna wo demokratiskich krajach Europy něhdźe ze 1970tych lět. W třećej rumnosći běchu zběrki bručkow, słowniki, tafle a dalše wučbne srědki widźeć. Samo blida a stólcy běchu w poskitku.