Kulow (AK/SN). Město Kulow chce klětu zaměrnje do wobłukow pěstowarnje, šule a wohnjowej wobory inwestować. Blisko Krabatoweje zakładneje šule na Zahrodowej hasy ma tuž nastać nowotwar katolskeho dźěćaceho domu Jakubecoweho skutka, kotrehož nošer je Kulowska wosada. Jako twarski knjez projekta wustupuje město Kulow. „Natwar noweje pěstowarnje hač do kónca přichodneho lěta je naš najwažniši dypk w hospodarskim planje. Za njón planujemy 2 298 000 eurow. Předwidźane je, zo bjerjemy za to 650 000 eurow kredita,“ podšmórny komornik Thomas Woelke na srjedownym wuradźowanju měšćanskeje rady. Jednohłósnje su zapósłancy hospodarski plan za lěto 2019 wobzamknyli. W nim předwidźa inwesticije cyłkownje něšto wjac hač 2,6 milionow eurow.