Swinjarčansku postawu swj. Bosćana tuchwilu wobšěrnje restawruja
Drježdźany (SN/MWj). Hakle hdyž wone pobrachuja, ći zwučene wěcy prawje napadnu. Takle so snano tele tydźenje někotremužkuli w Swinjarni dźe, dokelž na kromje wsy postawu swj. Bosćana njewuhlada. Po tym zo bě gmejnska rada Pančicy-Kukow loni wobzamknyła postawu a postament pod njej wobšěrnje ponowić, je Tina Dömling něhdźe 250 kilogramow ćežku pěskowcowu figuru wottwariła a do swojeje dźěłarnje w Drježdźanach-Pješinje (Pieschen) dowjezła. Tam nětko samostatna diplomowa restawratorka postawu ponowja, skóncowane dźěle wuporjedźa a pobrachowace přidawa.
„Při restawrowanju je wězo kóždy nadawk powabliwy a samo na sebi jónkrótny. Po tym zo běch sej postawu w Swinjarni wobhladała, pak běch sej wěsta, zo bych ju jara rady restawrowała“, Tina Dömling powěda. Hewak so wona často z kamjentnymi wazami, sćežorami a druhimi „mortwymi“ objektami zaběra. Rězbarjenu figuru w dźěłarni měć je jej tuž wosebite wužadanje.
