Komplikowane wuměnjenja za dwójny hospodarski plan
Trjebin (AK/SN). Gmejna Trjebin je dale w jara ćežkim pjenježnym połoženju. Dwójny hospodarski plan 2019/2020 móža jeno z wulkimi zalutowanjemi a z njelubowanymi naprawami nastajić. To podšmórny wjesnjanosta Waldemar Locke (CDU) na wčerawšim posedźenju gmejnskeje rady. „Jeli nětko njereagujemy, změjemy w lěće 2022 deficit 1,2 milionaj eurow“, wón podšmórny. „Přičina je, zo žane klučowe připokazanja Swobodneho stata Sakskeje njedóstanjemy. Bjez kredita tuž njepóńdźe, jeli chcemy wažnej předewzaći, mjenujcy wopłóčkowy koncept za Trjebink a wutwar šěrokopasmoweje syće w swojej gmejnje zwoprawdźić“, tak wjesnjanosta. Gmejna a gmejnscy radźićeljo dyrbja nětko wšě móžnosće zalutowanja pruwować. Na wurjadnym posedźenju 13. měrca chce parlament dwójny etat 2019/2020 wobzamknyć.
