Hišće čaka Telekom na wróćenje tójšto zrěčenjow za wutwar interneta
Budyšin (SN/at). Ze swojim projektom za wobšěrny šěrokopasmowy wutwar płaći Budyski wokrjes w swobodnym staće jako přikładny. Tuchwilu planujetej wobdźělenej telekomunikaciskej předewzaći Němska telekom a ENSO za město Biskopicy detaile trěbnych dźěłow. Po w interneće pod www.breitband-bautzen.de wozjewjenym planje maja so wone w aprylu započeć. Połdra měsaca wostawa, zo komuny swojich wobydlerjow na wosebitych zhromadźiznach wo projekće informuja. Zaměr wokrjesa je, telko domskich kaž móžno škleńčnonićowej syći přizamknyć. Zamołwići w Budyskim krajnoradnym zarjedźe su w tym zwisku stajnje „wo zwyšenju hódnoty ležownosće“ rěčeli. Jara wažne za móšeń wjesnjanow a měšćanow pak je, zo njetrjebaja za přizamk k domskemu ani centa płaćić.
