Pozdatne maličkosće žadaja sej prawe rozsudy gmejnskich radźićelow
Njeswačidło (JK/SN). Na Njeswačanskim kěrchowje je tež pomjatny kamjeń za padnjenych swětoweju wójnow. Tón pak hižo w najlěpšim stawje njeje. Je načasu jón ponowić a tak dostojnje na wopory wójnow spominać. Gmejna Njeswačidło je so na krajnu direkciju w Kamjenicy wobroćiła, zo by komunu z tutym předewzaćom, hdźež su za tajke pady zamołwići, pjenježnje podpěrała. Wšako ma tam němska organizacija za hladanje wójnskich rowow swoju wotnožku. A dóstała je na swoju próstwu financy w požadanym wobjimje. Tak radźićeljo na minjenym posedźenju přihłosowachu, nadawk Rjenčec a Weinrichec molerskemu zawodej w Njeswačidle přepodać. Ručež to wonkowne poměry dowola, tamniši přistajeni z dźěłami započnu.
