Znaty Budyski prawicar je za 8. měrc demo­nstraciju přećiwo Budyskej blogowarce Annalenje Schmidt přizjewił. Zastu­pjerjo Budyskeje měšćanskeje rady­ nětko namołwjeja, tomu samsny dźeń na měrliwe wašnje znapřećiwić.

Budyšin (SN/MWj). Planowanej prawicarskej demonstraciji 8. měrca w Budy­šinje njeměli wobydlerjo sprjewineho města bjez znapřećiwjenja přihladować. To bě přezjedne měnjenje Budyskich měšćan­skich radźićelow na jich wčerawšim posedźenju. W mjenje ewangelskeje a katolskeje wosady swj. Pětra radźićel Heiner Schleppers namołwješe, zo měli so měšćenjo a dalši tohorunja jutře za tydźeń we 18 hodź. na měrowym modlenju w tachantskej cyrkwi wobdźělić. Po tym chcedźa tam swěčki rozdźělić, z kotrymiž wobdźělnicy před cyrkej stupja. Na Mjasowych wikach ma potom k měrliwym rozmołwam dóńć.