Jedyn wólbny wokrjes je we wčerawšim rozprawnistwje SN wo wólbach Budyskeho wokrjesneho sejmika pobrachował, zo by dospołny wuslědk předležał. Tón bu po připołdnju wozjewjeny. Serbske wolerske zjednoćenstwo (SWZ) změje znowa runja CDU a Lěwicy jednoho wokrjesneho radźićela.
Budyšin (SN/at). Dawid Statnik za CDU (2 397 hłosow), Jan Budar za Serbske wolerske zjednoćenstwo (508 hłosow, wobaj wólbny wokrjes 12) a Hajko Kozel za Lěwicu ( 1 958 hłosow, wólbny wokrjes 6) su woni třo Serbja, kotřiž budu w nowym Budyskim wokrjesnym sejmiku sobu dźěłać. Jeničke wuměnjenje nětko je, zo woni wólby přiwozmu.
Ze snadnuškim předskokom 0,3 procentow je Alternatiwa za Němsku (AfD, 29,4 procenty) wólby Budyskeho wokrjesneho sejmika před CDU (29,1 procent) dobyła. Nowemu wokrjesnemu sejmikej přisłuša 98 wokrjesnych radźićelow. Konstituowace posedźenje je za póndźelu, 12. awgust, předwidźane.
