Hory (UH/SN). Wočakuješ-li po dlěšej přestawce zaso hosći, to wšitko trochu dokładnišo wurjedźiš, přihotuješ překwapjenki a začuwaš při wšěm dźěle wulke wjeselo. Runje tak dźe so wobydlerjam Horow w gmejnje Halštrowska Hola, kotřiž přihotowachu minjene dny a tydźenje 13. narodne zetkanje wsow a městow z mjenom Hory. Po cyłym Zwjazku mamy dohromady wosom městow a gmejnow kaž tež 17 dalšich měšćanskich a gmejnskich dźělow z tymle mjenom. Wot 1995 přewjeduja kóždej dwě lěće kónc tydźenja po Božim spěću zetkanje Horjanow, kotřiž chcedźa Hory z druhich kónčin kraja kaž tež jich wobydlerjow a wosebitosće zeznać.