Přichodnu póndźelu započnje so lětuša bičwolejbulowa tura Radija Satkula. Prjedy hač budźe kónc awgusta finale w Miłoćicach, so mustwa na wosom městnach wubědźuja. W małej seriji tule­ jednotliwe hrajnišća předstajimy.

Radwor (pdź/SN). Lubowarjo bičwolejbula změja přichodne tydźenje stajnje póndźelu składnosć, z druhimi mustwami zabawnje sportować abo jim přihladować. Radijo Satkula přewjedźe mjenujcy zaso swoju bičwolejbulowu turu.

Jako prěnju staciju mjez młodostnymi woblubowaneho sporta su sej Satkularjo Radwor wupytali. Tamniše wolejbulnišćo je drje porno tamnym stacijam poměrnje młode, ale za to we wuběrnym stawje. Přičina toho je po měnjenju zastupowaceho předsydy Radworskeho młodźinskeho kluba Dawida Wowčerja fungowaca zhromadnosć wužiwarjow hrajnišća, štož stej hłownje Sportowe towarstwo 1922 Radwor a tamniši młodźinski klub.