Nabožny festiwal pod hołym njebjom tysacy ludźi přiwabił

Róžant (gž/SN). Towarstwo Iniciatiwa Ostwind 3 000 je mjeztym hižo štwórty raz tak mjenowany Gig-festiwal, skrótšenka woznamjenja „God is good – Bóh je dobry“, wuhotowało. W Róžeńće je swjedźeń kónc tydźenja wšědnje wjace hač tysac hosći wopytało.

Pjatk wječor zahajichu nabožny swjedźeń z Božej mšu w Róžeńčanskej putniskej cyrkwi. Přizamknyło je so kino pod hołym njebjom. Z filmom wo dźiwa­dłowej inscenaciji z lěta 2013 „Róžant: legen­dy, fakty, ludźo“ zbližichu přitomnym stawizny wsy kaž tež hnadowneho městna. Sobotny program zahajichu z wjacorymi dźěłarničkami a ze sportowymi poskitkami, kaž na přikład z kopańcu a wolejbulom. Na putniskej łuce mějachu zajimcy móžnosć, typiske irske reje nawuknyć. Pokazali su je jim čłonojo irskeje skupiny I AM. Wobdźělnicy móžachu so pozdźišo sami wuspytać a na koncerće pokazać, što su nawuknyli.