Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo rady k bjesadźe zetkawachu. W našej lětnjej seriji na něhdyše wjesne wobchody dopominamy.
Dźensa: Rakecy (10)
Ze załoženjom konsumoweho drustwa w 19. lětstotku natwarjachu krok po kroku tež w našej kónčinje konsumowe předawarnje za zastaranje ludnosće. W Rakecach bě to 1921. Lětoličba, do nowotwara nad zachodom zwěčnjena, je dźensa hišće widźomna. Pozdźišo bu dróha, kotraž nimo předawarnje wjedźe, jako Konsumowa pomjenowana. Jako tajka je wona Rakečanam dźensa hišće znata. Młodźi ludźo lědma wědźa, zo bě to před nimale sto lětami wobchod, hdźež sy nimo žiwidłow dalše wěcy wšědneje potrjeby dóstał. W Rakečanskim domizniskim muzeju pokazane foto dokumentuje, zo bě nad zachodom za čas Weimarskeje republiki tež serbski napis, a to jenak wulki kaž němski.