Złyčin (AK/SN). Wjelelětne nazhonjenja nastupajo plahowanje němskeho wowčeho psa su so njedawno za Złyčinsku (Litschen) skupinu Łazowskeho psyčeho kluba wudanili. Na 22. wubědźowanju wo pokal Slěborneho jězora wobsadźichu hnydom třo čłonojo towarstwa prědnje městna. Su to zamołwity za plahowanje Peter Rössel, předsyda towarstwa Udo Wićaz a zamołwity za wukubłanje Kay Rössel. Woni kwalifikowachu so za sakske mišterstwa wot 9. do 11. awgusta w hornjołužiskim Gersdorfje pola Rychbacha.

„Wubědźowanje wo pokal Slěborneho jězora ma dołhu tradiciju. Naš bywši wjesnjanosta Klaus Gutschke bě jón 1995 nastorčił“, praji Peter Rössel. Za Złyčinske towarstwo je to najwažniše wu­bědźowanje a wjeršk sezony. Nimale 200 ludźi je sej tónkróć jednotliwe discipliny wobhladało, kotrež mějachu so zmištrować. Tak dyrbjachu psy slěd wučuchać, so podrjadować a swojeho knjeza škitać. „Wšitke tři discipliny su jara naročne“, podšmórnje Udo Wićaz. Psyk dyrbi so při čuchanju koncentrować, dyrbi posłušny być a zdobom kmany zakitować.