Štó a što tči za serbskimi projektami, kotrež su we wobłuku wubědźowanja Sakskeho fondsa „Čiń sobu!“ mytowali? W lětušim lětnim serialu Serbskich Nowin wam projekty předstajamy.
Zanjechane stare kamjentne pućniki wokoło Radworja su wjesnjana Jana Nuka hižo dołho mjerzali. Trochu zawistnje dyrbješe wón tomu přihladować, kak z naležnosću w druhich gmejnach wobchadźeja, na přikład w Hodźiju. Tam su dawno zdokonjeli tajke mězniki wobnowić. Wšitke pospyty, pućniki tež w Radworju ponowić a dwurěčnje woznamjenić, su dotal na trěbnym swójskim podźělu zwrěšćili, kotryž dyrbiš přinošować, chceš-li spěchowanske srědki wužiwać.
Namołwa k iniciatiwje „Čiń sobu“ bě tuž bywšemu předsydźe Domowiny pohon so do dźěła dać. Rozhladujo so po gmejnje móžeše wón cyłkownje jědnaće starych kamjentnych pućnikow „znosyć“. Te steja w Radworju na hasy Pod dubami runje tak kaž na nawsy. Dalše ponowjenja nuznje trěbnych objektow su w Bronju, na křižowanišću mjez Bronjom a Nowym Bronjom, w Chelnje, w Radworskim Haju, w Lutobču, we Łupoji, Łupjanskej Dubrawce, w Kamjenej a Stróžišću.