Budyšin (CS/SN). Z Božej słužbu w Budyskej Marje-Marćinej cyrkwi pod nawodom ewangelskeho superintendenta Tilmana Poppa zahajichu wčera rjad zarjadowanjow, kotrež maja 30. róčnicu měrliweje rewolucije a na to sćěhowacy natwar w Budyskim wokrjesu wopominać. Mjenowana cyrkej bě před třiceći lětami zetkanišćo ludźi, angažowacych so za měrniwe akcije. Kaž w Lipsku na historiskim dnju 9. oktobra běchu tež w Budyšinje Bože domy městnosće, hdźež su z modlitwami a swěčkami měrliwu rewoluciju nastorčili. Wopominajo tehdyše podawki su tuž wčera znowa swěčki zaswěćili, wo měr so modlili a kěrluše spěwali, kotrež běchu 1989 w cyrkwjach zanošowali. Jako časowaj swědkaj staj by­wši Budyski měšćanosta Christian Schramm a Budyski krajny rada Michael Harig (CDU) na to spominałoj, kak běštaj samaj tele hnujace dny nazymu 1989 dožiwiłoj, a předčitaštaj chroniku.