Stare Slepjanske kubłanišćo chcedźa sej wobydlerjo hišće raz wobhladać
Slepo (AK/SN). Twar Slepjanskeho němsko-serbskeho šulskeho centruma so nachila, rjekny twarski nawoda gmejny Slepo Steffen Seidlich na wutornym posedźenju gmejnskeje rady. Hač do kónca nowembra maja twarske dźěła wotzamknjene być. 12. decembra ma hłowny planowar twar přepruwować. Wot 24. februara 2020, prěnjeho šulskeho dnja po zymskich prózdninach, budu so šulerjo a wučerjo tydźeń z objektom zeznajomić móc. Oficialne poswjećenje budźe potom 28. februara.