Čorny Chołmc (SiR/SN). Stara powěsć trjechi na čerstwe, načasne, nowe ideje, bjeztoho zo by wid na historiske wažnosće a detaile spušćiła. Dieter Klimek jako Čorny Młynk wjedźeše naležnosć předwčerawšim popołdnju na arealu Čornochołmčanskeho Krabatoweho młyna spěšnje na dypk: „Krabatowy młyn trjeba młodych ludźi z modernymi myslemi. Jedyn z wuslědkow tejele wuspěšneje kombinacije je na nazymskim swjedźenju widźeć.“
Chwalba słušeše předewšěm Magdalenje Schaffer. Młoda žona podpěruje wot lětušeho lěća dźěćace a młodźinske dźěło na Krabatowym młynje a je sej ze swojimi kolegami něšto cyle wosebite wumysliła, štož tam hišće njemějachu: Jězbnu dowolnosć dźěćom za pušćenje zmijow. Jeničce za to su kwis wuwili. Zhromadnje ze staršimi dyrbjachu dźěći njedźelu prawe wotmołwy na tam stajene prašenja namakać. Strašne milinowody, njewjedra, přirodo- kaž tež ptakoškitne pasma hrajachu při tym runje tak wažnu rólu kaž prawy material a přisłušk za twar zmijow, štož móže při wopačnym wužiwanju k zranjenjam wjesć.