Klóšter Marijina hwězda planuje bywšu starownju w Swinjarni přetwarić

Kašecy (SN/JaW). Klóšter Marijina hwězda chce bywšu Swinjarčansku starownju na spěchowansku šulu pře- a wutwarić. Wo tym je Pančičansko-Kukowski wjesnjanosta Markus Kreuz (CDU) tamnišich gmejnskich radźićelow na minjenym posedźenju w Kašecach informował. Klóšter bě próstwu wo twarsku dowolnosć zapodał, za kotruž ma gmejna swoje stejišćo twarskemu zarjadej zapodać.

Kaž wjesnjanosta wuwjedźe, wotpowěduja plany klóštra předpisam. Zdobom ma klóšter wosebite předpisy wobkedźbować, dokelž steji tamniša bywša starownja na sakskej lisćinje kulturnohistoriskich twarjenjow. „Wone njeje hišće syći pitneje wody přizamknjene. Planowane pak je, Swinjarnju hač do kónca lěta 2020 syći přizamknyć“, Pančičansko-Kukowski wjesnjanosta Kreuz připowědźi. Wšako su spěchowanske srědki přizwolene, a gmejna dyrbi je hač do kónca 2020 přetrjebać, kaž wón přitomnym rozłoži.