Pančicy-Kukow (SN/JaW). Wobydlerjo a šoferojo, kotřiž časćišo statnu dróhu S 100 přez Pančicy-Kukow wužiwaja, dyrbja so bórze znowa na wobchadne poćežowanja nastajić. To wobkrući wjesnjanosta Markus Kreuz (CDU) na minjenym posedźenju gmejnskeje rady w Kaščanskej wjacezaměrowej rumnosći, hdźež bě so radźićel dr. Joachim Kokla w tym zwisku naprašował.
Kaž Pančičansko-Kukowski wjesnjanosta na naprašowanje našeho wječornika nazornje rozłoži, jedna so při dróhotwarskim předewzaću wo sporjedźenje njedostatka. „Na dźělu dróhi dyrbi firma nowu jězdnju saněrować. Dokelž njejstej so nošna a zwjeršna woršta dróhi prawje zlěpiłoj, su tam mjeztym prěnje škałoby a rozpukanja spóznajomne“, Markus Kreuz wuswětli. Kaž wón dale zdźěli, je za sporjedźenje dróhi Krajny zarjad za dróhotwar a wobchad (LASuV) zamołwity. „Dotal hišće žane informacije wo tym nimamy, hdy budźe što na dróze sporjedźane a kak“, wón rjekny. Sam je skerje připadnje wo naprawje srjedź Pančic-Kukowa zhonił, jako dźěše wo planowanje w naležnosći twara kolesowanskeje šćežki ze Swinjarnje do Zejic.