Wojerecy (AK/SN). Město Wojerecy změje tež lětsa wobydlerski hospodarski plan. Za njón chce zaměrnje pawšalu 70 000 eurow k spěchowanju wjesneho ruma Swobodneho stata Sakskeje zasadźić. Wot dźensnišeho 6. januara móža wobydlerjo Wojerec a měšćanskich dźělow wo namjetach wothłosować.
Cyłkownje běchu wobydlerjo měšćanskemu zarjadnistwu loni 129 idejow za lětuši wobydlerski etat zapodali. Z nich je zarjadnistwo po pruwowanju přez fachowe wobłuki lisćinu cyłkownje 29 idejow zestajiło. Měšćanska rada je ju na zakładźe poručenja wodźenskeje skupiny „wobydlerski etat“ na swojim poslednim wuradźowanju minjeneho lěta 17. decembra jednohłósnje schwaliła. Tuž ma nětko kóždy wobydler Wojerec składnosć, hač do 27. januara sobu rozsudźić, hdźe a za čo móhli pjenjezy nałožić. Kóždy ma při tym tři hłosy, kotrež móže za namjety wotedać – pak za inwesticije w měsće samym pak za inwesticije w měšćanskich dźělach. Wotedate hłosy za žro města a měšćanske dźěle separatnje wuliča, kaž k tomu z radnicy rěka.
