Za měsac maja šulerki a šulerjo do nowych rjadownjow zaćahnyć
Slepo (AK/SN). Němsko-serbski šulski centrum w Slepom je nimale hotowy. To podšmórny nawoda zarjada za planowanje, twarstwo a hórnistwo w zarjadniskim zwjazku Slepo Steffen Seidlich na minjenym posedźenju gmejnskeje rady. „Tuchwilu wukonjeja dźěłaćerjo jenož hišće někotre mjeńše zbytne dźěła“, wón rozłoži. „Nimo toho twar doskónčnje rjedźa.“ Hišće tón měsac planuja wotewzaća wukonow z krajnym młodźinskim zarjadom, ze žiwidłowej kontrolu kaž tež z přisłušnej społnomócnjenej za naležnosće zbrašenych w Zhorjelskim wokrjesu Elviru Mirle. Za přichodny měsac předwidźa zamołwići přećah zakładneje a wyšeje šule z dotalneho stejnišća při sportowni do noweho centruma na Grodkowskej dróze. Gmejna Slepo mjeztym hižo intensiwnje z firmu jedna, kotraž přećah kubłanišća přewjedźe. „W hrubym wšak su předewšěm wučerjo namołwjeni trěbne přihoty za přećah k terminej zmištrować.“