Radwor (SN/BŠe). Kóžde lěto maja gmejny swój etat zestajeć a inwesticije planować. Zo dyrbja woboje hladajo na zadołženje stajnje derje wotwažować, pokaza so na wčerawšim posedźenju gmejnskeje rady w Radworju, hdźež so trěbne inwesticije kopja. Jako nošer šule maja so tež wo nju starać a dyrbja tam wobstajnje inwestować. Hnydom wjacore naprawy měli na kubłanišću nuznje přewjesć, zo móhli wšitkim – wučerjam kaž šulerjam – dobre wuměnjenja skićić. Ze sumu, kotruž ma gmejna k dispoziciji, pak to móžno njeje. Wšako čaka w tamnych wobłukach, kaž na přikład hladajo na wobnowjenje dróhow, dosć nadawkow.
Z temu šula chcedźa so gmejnscy radźićeljo tuž na wuradźowanju w meji rozestajeć. „Dyrbimy zakładnje wo nošerstwje šule rozmyslować. Wěste je, zo je jeje stejnišćo hladajo na mało šulskich kubłanišćow we wokolinje nuznje trěbne“, wuzběhny Radworski wjesnjanosta Wincenc Baberška (CDU). Hinašeho nošerja namakać abo šulu na cyłotnu wusměrić, kaž je w koaliciskim zrěčenju noweho sakskeho knježerstwa předwidźane, stej móžnej alternatiwje.