Organizować je jeje wulka sylnosć. „Tónle talent mam wot našeho nana“, měni Gabriela Korchowa. Prěni raz angažuje so wona w přiradźe za serbske naležnosće města Wojerec.
Kubłanje dźěći po modelu Witaj w Němčanskej pěstowarni „Pumpot“, koncept 2plus na Handrija Zejlerjowej zakładnej šuli a serbšćina na přichodnej Wojerowskej wyšej šuli kaž tež na Lessingowym a křesćanskim gymnaziju Johanneum jej jara na wutrobje ležitej. „Wažne su tež městu přisłušace wsy. My jako přirada móžemy předewšěm připosłuchać a ludźi zmužić serbšćinu nałožować“, Korchowa wuswětla.
Z Konjec pochadźaca je w serbskej swójbje wotrostła a hakle w šuli němčinu donawuknyła. Hižo zahe horješe so za kulturu, spěwaše w šulskim chórje a rejwaše w Smjerdźečanskej rejwanskej skupinje. Dlěje hač dźesać lět angažuje so mjeztym w předsydstwje towarstwa Kulowskich Serbow Bratrowstwo. Dale přisłuša wona předsydstwu Wojerowskeje župy „Handrij Zejler“. 1978 je so do Němcow wudała.