Wurjadne posedźenje Budyskeho wokrjesneho sejmika ke Kamjenskej halowej kupjeli wotmě so wčera na namjet frakcije AfD. Wona nochcyše žadyn čas brojić, zo móhło zarjadnistwo přihoty za nowotwar kupjele nowowusměrjene dale wjesć. Frakcije Lěwicy, SPD a Zelenych pak su z mjeńšinowym namjetom po § 5, wotrězku 2, sadźe 2 hłownych wustawkow Budyskeho wokrjesa docpěli, zo bu naćisk wobzamknjenja AfD techniskemu wuběrkej dale daty.
Budyšin (SN/at). W swojich oranžojtych jakach su čłonojo Kamjenskeje wodoweje straže na městnach za hosći napadnyli. Woni pak běchu wo přeběhu posedźenja wokrjesneho sejmika přesłapjeni. „Smy sem přišli, zo bychmy nadrobnišo wo projekće zhonili. Wšako dźe wo naše dźěłowe městna“, bě wot nich słyšeć. Loni w rozmołwje běchu ze zastupjerjemi krajnoradneho zarjada swoje žadanja za nowu kupjel zwuraznili. Što pak z toho budźe? „Transparenca to žana njeje“, wodowi stražnicy wobžarowachu.