Motor Kumwałd
– ST Marijina hwězda 5:0 (2:0)
Zestawa hosći: D. Matik – R. Hawš, J. Rab, J. Zelnak, R. Cyž, Ch. Cyž, O. Hawš, J. Kuring (78. T. Jurš), F. Peschmann (46. F. Pjetaš), A. Eldor (73. D. Jurš), J. Pakoßnick
W jara wažnej hrě přećiwo direktnemu konkurentej z Kumwałda dyrbjachu koparjo ST Marijineje hwězdy, chowancy trenarskeje dwójki Erwin Kleinmann/ Bodo Pjetaš, na kóždy pad dypkować, zo bychu susodow w tabulce wokrjesneje wyšeje ligi znajmjeńša na distancu dźeržeć móhli. Přišło pak je wšitko hinak.
Prěnje składnosće móžeše zadnje mustwo hosći hišće wotwobarać, abo wone měješe zbožo. Domjacy nadběhowarjo wrota někotre razy snadnje misnychu, ale w 22. min. skónčnje klinkaše. Nichtó njezamó bul po róžku wotwobarać, a Jan Hybner zhłójčkowa jón bjez wulkich ćežow k 1:0 do kašćika. Štyri mjeńšiny na to padnychu druhe wrota. Oskar Striegler sadźi kulowatu kožu ze swojej třělwu wot kromy šěsnatki njedźeržomnje na spódnju kromu łaty, a wottam dźěše bul do saka. Hač do přestawki Pančičenjo domjacym žane dalše wrota wjace njedowolichu.