Budyšin (SN). Z cyrkwjemi, industrijowymi připrawami, bydlenskimi domami a zahrodami je Budyska pomnikowa krajina přewšo wotměnjawa. Tohodla wužiwaja kóžde lěto tysacy ludźi w septembru składnosć, sej město raz z hinašeho wida zbližić. Lětuše hesło dnja wotewrjeneho pomnika w Budyšinje poćahuje so na lěto industrijoweje kultury, kotrež je Swobodny stat Sakska za 2020 wuwołał. Wotnětka hodźa so na Budyskim měšćanskim zarjadnistwje zapodać namjety, kotre twarjenja a připrawy měli na dnju wotewrjeneho pomnika 13. septembra zjawnosći spřistupnić.
Bohate industrijne stawizny wobraz Sakskeje hač do dźensnišeho postajeja. Tež w Budyšinje je 500lětna industrijowa a přemysłowa tradicija swoje slědy zawostajiła, w architekturje runje tak kaž na techniskich pomnikach a w muzejach. Změna časow wjedźeše k wobstajnemu rozestajenju z industrijowej kulturu. To bě tež někotremužkuli akterej, předewzaćelam, wobsedźerjam a měšćanskim planowarjam wulke wužadanje.