We Wojerowskim zwěrjencu tuchwilu žanych wopytowarjow nimaja a tak tež žane dochody. Pjenježne wudawki pak wostanu. Přiwšěm spytaja ze situacije to najlěpše sčinić.

Wojerecy (SiR/SN). Na mnohich městnach we Wojerowskej coologiskej zahrodźe tuchwilu kćěje. Loni do zemje stykane kwětkowe cyble so nětko w najrjeńšej pyše pokazuja. Rjany napohlad měł wopytowarjow zwjeselić, wokomiknje pak je wón jeno sobudźěłaćerjam popřaty, kaž nawoda Eugène Bruins rozprawja. „Prózdny zwěrjenc ničo rjane njeje, to je cuze a njezwučene.“

A přiwšěm móže Bruins tež pozitiwne wěcy mjenować. Tak ma za něšto tydźenjow připrawa pinguinow doskónčnje saněrowana być. Mjeztym je znate, zo dóstanu pjeć pinguinow z Halle a dalše pjeć z francoskeho Beauvala. Twarske dźěła na wulkej insektowej lounge su tohorunja w dalokej měrje wotzamknjene. To wjeseli tež přichodnych wobydlerjow, kotrež so pola Silki Kühn zynčo přizjewjeja, hdyž zwěrjencowa pedagogowka insektowy hotel z bambusom, rohodźu a dalšimi maćizna wuhotuje.