Hłowu do pěska tykać ničo njepřinjese – wažne je dale činić
Brězowka (CK/SN). Korony dla je připrawa Wake & Beach při Brězowskim jězoru (Halbendorfer See) lětsa wjele pozdźišo startowała. Přiwšěm mějićel André Böhme hłowu do pěska njetyka, ale dale čini. Wšako z dowolnosću za sport pod hołym njebjom lóšt za zaběru při a na wodźe mjez ludźimi zaso přiběra, tež hdyž je to dotal jeno z wobmjezowanjemi móžne. Tak smě maksimalnje 20 wakeboarderow na dwě hodźinje na jězor. „Koordinacije dla dyrbja so zajimcy do toho přizjewić“, je Böhme wjesoły, zo jězor nětko scyła zaso wožiwja.