Wojerecy (KD/SN). Wjeršk kóždolětneho lěćneho programa Wojerowskeje Kulturneje fabriki (Kufa) je nadróžne dźiwadło na Piwarskej hasy. Na lětušu pomjeńšenu wariantu minjenu njedźelu popołdnju přichwata tójšto ludźi do Kufa, hdźež hudźeše orchester Tango Misterio. Rejwali su k tomu pory, kotrež tam kursy wopytuja. Tež Anke a Olaf Kühn běštaj mjez nimi a wjesołaj, zo móžeštaj po dołhej přestawce zaso k argentinskej hudźbje swoje koła wjerćeć. Tři měsacy dyrbještaj zwisk k přećelam tango-hudźby přez telefon abo z mejlkami wudźeržować. Na parkowanišću Kulturneje fabriki lubješe so ludźom program amerisko-němskeho duwa „Bobarino a knježna Döpp“. Dale překwapi skupina Tridocoulus z Berlina ze spěwom, breakdanceom a akrobatiku. Semion Bazavlouk rozkładowaše princip beatboxinga, kak je móžno z hubu bijadło abo perkusijowe instrumenty imitěrować. Trójka Tridocoulus je so Helze Kopischke z Wojerec najlěpje lubiła. Jako młoda žona dźě běše wona sama artistka a měnješe, zo ma „tele zarjadowanje za žiwjenski eliksěr“.