Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Towarstwo za hajenje kultury srjedźneje Łužicy z.t. (5).
Bórze po politiskim přewróće zeńdźe so w decembrje 1991 dohromady 15 Wojerowčanow, zo bychu załožili towarstwo, kotrež „wěnuje so zachowanju wědy wo serbskej regionalnej drasće“. Bě to trěbny rozsud wosebje tež tohodla, dokelž sy w běhu minjeneho poł lětstotka we Wojerecach a wokolinje wšědny dźeń lědma hišće nošerki Wojerowskeje narodneje drasty widźał. Iniciatorka zeńdźenja bě Kirsten Bejmina. Mjez wobdźělnikami běchu zastupjerjo tehdyšeho dźěłoweho kruha za serbske naležnosće kaž tež pozdźiši Wojerowski měšćanosta Horst-Dieter Brähmig a něhdyši superintendent Friedhart Vogel.
