Profil wikow sobu wobwliwowało

Dienstag, 04. August 2020
Artikel bewerten
(0 Stimmen)
Předsydka towarstwa Radiška Měrka Kozelowa před Stróžanskej starej šulu, hdźež je dźensa šulski muzej Foto: Alfons Handrik Předsydka towarstwa Radiška Měrka Kozelowa před Stróžanskej starej šulu, hdźež je dźensa šulski muzej Foto: Alfons Handrik

Nimo wulkich nadregionalnych serbskich­ towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele nje­zhoniš. W swojej lětnjej seriji­ lětsa tajke aktiwne cyłki před­sta­jamy, dźensa Towarstwo Radiška (9).

Stróža pola Hućiny je lubowarjam při­rody wočerstwjenski paradiz z jónkrótnym ekosystemom. Mało ludźi pak zhoni, zo je kupa Radiška wosrjedź Olby bywše słowjanske hrodźišćo. Wurywanki z 13./14. lětstotka kaž hornčerske wudźěłki, pódkowy a brónje na to pokazuja. Dźensa drje hrodźišćo, kotrež bě něhdy 38 króć 27 metrow wulke, lědma hišće spóznaješ. Scyła je přistup na kupu hórniskich předpisow dla zakazany.

Něšto lět po politiskim přewróće běchu někotři wědomi Serbja Stróže a Lemišowa na iniciatiwu Siegharda Kozela rozmyslowali, mjez druhim z bywšej Stróžanskej šulu na něhdy ryzy serbsku wjes dopominać. Tak załožichu spočatk lěta 1998 towarstwo, kotremuž tehdy 25 ludźi přistupi. Za předsydku wuzwo­lichu Měrku Kozelowu. Funkciju wona mjeztym 22 lět wukonja. Swoje towarstwo mjenowachu Radiška. Tak wuzběhnychu identifikaciju serbskeje a njezabyteje zašłosće ze zaměrom, ju po swojich móžnosćach zaso wožiwić. Towarstwo staji sej wjacore nadawki. Tak chcychu lěta­ 1844 twarjenu šulu, kotraž so 1897 wotpali a bu znowa natwarjena, jako šulski muzej wuhotować. Tu bě dźesać lět hač do 1852 Korla Awgust Kocor z wu­čerjom. Po zawrjenju zaměstnichu tam 1951 nachwilnje wjesnu předawarnju konsuma, a wjacore lěta wužiwachu wulku rumnosć za filmowe předstajenja. Docy­ła bě to wjele lět wjesne zetkanišćo. Towar­stwo Radiška je z wutwarom by­wšeje šule na muzej wulke dźěło na so wzało, ale tež něštožkuli docpěło. Wo­dźenja su spočatnje čestnohamtsce zaručili. Mjeztym so Marlis Konjechtec wo to stara,­ tak zo je muzej wobstajnje wote­wrjeny. Zajimcy tam zhonja, kak běchu šulerjo před 150 lětami wuknyli a z pjerom pisali.

Jako wobstajny nadawk towarstwo Radi­­ška wobhladuje, zaručić serbski wobsah na kóždolětnych Stróžanskich nalětnich a nazymskich přirodowych wikach.­ Tam wopytowarjo jeno serbske programy njedožiwjeja, ale zbližeja sej tež bo­hatosć serbskeje narodneje drasty. Stajnje wječor do wikow organizuje Ra­diška koncert klasiskeje serbskeje hudźby a pokazuje tak zdobom na namrěwstwo komponista Korle Awgusta Kocora.

Bjezposrědnje po załoženju přistupi towarstwo Radiška Budyskej župje „Jan Ar­nošt Smoler“. Tak je intensiwne zhro­mad­ne dźěło zaručene. Wulki wuspěch je profil ­wikow, kotrež su wuspěšnje na něm­sko-serbske wuwili. Nimo do­bre­ho wobsaha ma towarstwo na starosći, přihotować něhdźe 3 000 parkowanskich městnow, štož je z wjele organizato­ri­skim dźěłom zwjazane a jeno z podpěru wjele pomocnikow móžne. Wobydlerjo su zwólniwi towarstwo podpěrać.

Towarstwu Radiška přisłuša dźensa 35 čłonow. Woni dźiwaja na aktiwnu zhromadnosć, štož je tež zasłužba městopředsydki Jany Pětroweje z Lemišowa. Na kóždolětnej wuprawje dojědu sej z dalšimi zajimcami zwjetša do sło­wjanskeho wukraja. Za lětsa planowanu wopomnjensku jězbu na slědach Zejlerja a Kocora chcedźa z koncertom jeju twórbow­ skónčić. Dokelž pak je tuchwilu ćežko tajku zhromadnu jězbu planować, termin dotal hišće znaty njeje. Alfons Handrik

Veröffentlicht in Lokalka

Galerie

dalši wobraz (1)
Bitte anmelden, um einen Kommentar zu posten

Anzeige