Runja wšitkim druhim kupjelam w Hornjej Łužicy je tež Kulowska tele dny přewšo derje wopytana. Přiwšěm wona njedawno měšćanskich radźićelow zaběraše. Někotři wočakuja njewočakowane wobmjezowanja.
Kulow (AK/SN). Měšćanscy radźićeljo Kulowa su sej přezjedni, zo je tamniša lěsna kupjel za město a wokolne wsy dale trěbna. Ju maja dołhodobnje zawěsćić a wo jeje dalšej eksistency njeměli žane dwěle być. Wo změnje popłatkowych wustawkow, kotrež płaća wot 11. decembra 2014, pak maja radźićeljo rozdźělne měnjenja. To wotbłyšćowaše so na zašłym posedźenju měšćanskeje rady, jako tale tema na dnjowym porjedźe steješe a so wo kontrowersnu diskusiju postara.
