Prěnje zarjadowanja Kulowskeho karnewala lětsa wotprajene

Kulow (SN/MWj). Koronapandemija je nětko tež Kulowski karnewal dosćahnyła. Hladajo na najnowše škitne postajenja, kotrež wot 1. septembra płaća, je so předsydstwo Kulowskeho karnewaloweho towarstwa rozsudźiło póstnisku sezonu zdźěla wotprajić. „To potrjechi najprjedy raz mjezynarodne rańše piwko a kapičkowe wječory w nowembru“, informuje prezident towarstwa Mathias Glaab.

Předsydstwo wotpowěduje tak swojej zamołwitosći čłonam towarstwa kaž ­tež hosćom napřećo. „Wobstatk našeje karnewaloweje kultury su kompleksne a z wjele přihotami zwjazane zarjadowanja, na kotrychž so wjele ludźi zetkawa a zhromadnje swjeći. Póstniske podawki na poł połnej žurli, bjez rejow a barow, z wotstawkom a ze škitnym nahubnikom njemóžemy sej předstajić. Nimo toho so wone wudanili njebychu“, Mathias Glaab rozłožuje. Kak klětu dale póńdźe, dotal hišće wěste njeje. W nowembru chcedźa rozsudźić, hač kapičkowe wječory a póstniskej ćahaj přewjedu.