Wočerstwjenišćo we Wojerecach chcedźa hač do lěta 2024 přetwarić
Wojerecy (AK/SN). Mjeztym 21 lět wobstejaca Wojerowska Łužiska kupjel ma so přichodnje moderniša, kreatiwniša a ekologiska stać. W aprylu 2024 chcedźa ju po dwěmaj lětomaj přetwara zaso wočinić. Na swojim zašłym posedźenju je měšćanska rada wobzamknyła, projekt sobu podpěrać. Za to chcedźa zrěčenje mjez kupjelu a městom wotzamknyć.
„Łužiska kupjel je so we wšěch lětach wobstajnje dale wuwiwała“, rozłoži jeje jednaćel Matthias Brauer. Spočatnje mějachu wob lěto tři strowotniske kursy, dźensa je jich 20. Tydźensce maja nětko šěsć płuwanskich kursow, tehdy bě to jenički. Ličba wobdźělenych kubłanišćow na šulskim płuwanju je wot třoch na wosom rozrostła. Nětko storča na swoje hranicy a trjebaja wjace kapacitow za kursy, šulske płuwanje a za wšědnych wopytowarjow kupjele a sawny. Pomjeńšiło je so porno tomu mnóstwo přetrjebaneje miliny wot 2,1 miliona kilowattowych hodźin w lěće 2010 na dźensa 1,05 milionow kilowattowych hodźin wob lěto.