Torsten Ruban-Zeh jako nowy wyši měšćanosta Wojerec spřisahany

Wojerecy (AK/SN). Wojerecy su nastu­pajo strukturnu změnu w běhu kónca wudobywanja brunicy hač do lěta 2038 mjez hłownje potrjechenymi komu­nami. „Tele poselstwo chcemy do směra na Drježdźany zesylnjeć a wo podpěru wabić. Hromadźe z gmejnami we woko­li­nje chcemy za přichod trěbnu infrastrukturu wutworić ... Wojerecy budu wokolnym komunam kruty motor a partner na samsnej runinje“, zawěsći nowy wyši měšćanosta Torsten Ruban-Zeh (SPD) w swojej nastupnej narěči wčera na wosebitym posedźenju měšćanskeje rady.

Na žurli Léona Focaultoweho gymnazija běchu nimo radźićelow tež wjesni předstejićerjo, přirady, komunalni sobudźěłaćerjo, wobydlerjo, Budyski krajny rada Michael Harig (CDU), Kamjenski wyši měšćanosta Roland Dantz (njestronjan) a Łazowski wjesnjanosta Thomas Leberecht (CDU) přitomni.