Budyšin (SN/MWj). Wulke wjeselo knježeše tele dny w archiwnym zwjazku Budyšina na Hrodowskej. Někotre wosebje ćežko wobškodźene historiske protokole sprjewineho města maja po restawrowanju přez Lipšćansku specialnu firmu zaso swoje městno w magacinje.

Do wobstatka radnych protokolow słuša 257 zwjazkow, kotrež wotbłyšćuja skutkowanje Budyskeje měšćanskeje rady wot lěta 1623 hač do 1832, jako bu powšitkowne zarjadnistwo wutworjene, rěka w nowinskim zdźělenju radnicy. Měšćanska rada wobsteješe wjele lětstotkow z kruha zamóžitych wobydlerjow, kotřiž sej zastojnstwo měšćanosty kóždolětnje dale dawachu. Bě-li něchtó z nich schorjeł abo zemrěł, buchu mužojo z druhich swójbow přez čłonow rady do gremija powołani. Zwjetša wukonjachu woni swoje zastojnstwo nimo powołanja a so tohodla jónu abo dwójce wob tydźeń w radnicy zetkachu, rěčo tam wo wažnych naležnosćach.