Přirada za serbske naležnosće města Wojerec podpěruje angažement za serbsku rěč a serbske nałožki w měšćanskich dźělach.

Wojerecy (AK/SN). Ze serbšćinu kóžde zetkanje gremija zahajeja. „Dźe wo leksiku. Rěčimy na přikład wo koronawirusu, wo wólbach wyšeho měšćanosty, wo měsće. Runje tak dźe mi wo wšědne serbske žiwjenje“, wuswětla čłonka Wojerowskeje přirady za serbske naležnosće Brigita Šramina. Dźewjećčłonski gremij bě loni jara aktiwny a je intensiwne lěto přežiwił.