Poslednje dny stareho a prěnje dny noweho lěta su na mnohich městnach składnosć, na dźěło minjenych dwanaće měsacow zhladować. Serbske Nowiny rozhladuja so po dwurěčnych komunach, što su tam wšo zdokonjeli.
Njebjelčicy (JK/SN). Zo je Njebjelčanska gmejna jara aktiwna, dźe-li wo to, wožiwić wjesne žiwjenje abo wjeski gmejny na žiwjenjahódne městnosće wukmanić, je daloko a šěroko znate. Tež loni su w tym nastupanju najebać wobmjezowanja koronapandemije dla aktiwni byli. Hižo nalěto stej zaběžałoj iniciatiwa za kubłanje na wsy kaž tež akcija politiskeho kubłanja pod hesłom „Rozmołwa na městnje – Talk vor Ort“, kotruž zhromadnje z Budyskej ludowej uniwersitu a Sakskej krajnej centralu za politiske kubłanje organizuja. Dobre a wjele lubjace zazběhi wobeju naprawow pak njemóžachu pandemije dla dale wjesć. Kaž wjesnjanosta Tomaš Čornak (CDU) wobkrući, chcedźa, ručež zaso normalita do towaršnostneho žiwjenja zaćehnje, z akcijomaj pokročować.
