Krynhelecy (AK/SN). Hamorska gmejna chce swój komunalny lěs dale zaměrnje a zamołwiće wobhospodarić. To potwjerdźi nawodnica twarskeho zarjada Cortina Kokles póndźelu na posedźenju gmejnskeje rady w Krynhelčanskim kulturnym domje. Tam su hospodarski plan za komunalny lěs gmejny Hamor za lěto 2021 jednohłósnje wobzamknyli. „Dalša katastrofalna situacija škita lěsow a z toho wurosćace wikowanje z drjewom zawinujetej dalše přestorčenje loni planowaneho pušćenja štomow. Lěs wobhospodarja w nadawku gmejny statny zawod Sachsenforst, štož je 190 hektarow.
W hospodarskim planje 2021 maja pozitiwny wuslědk něhdźe 3 300 eurow za móžny. Gmejna planuje dochody 22 300 eurow z předanje drjewa. Etat předwidźi dohromady 19 050 eurow wudawkow. W nich zapřijate je 13 658 eurow za pušćenje štomow, 570 eurow za pozelenjenje wobstatka a 4 822 eurow za zarjadniske kóšty.
