Běła Woda (AK/SN). Ramikowe dojednanje mjez energijowym koncernom LEAG a městom Běła Woda k podpěrje powšitkownowužitnych towarstwow tež lětsa płaći. Tole zdźěli wyši měšćanosta Torsten Pötzsch (Klartext) na zašłym posedźenju měšćanskeje rady. Towarstwa móža hač do kónca februara w měšćanskim zarjadnistwje próstwu wo pjenježne spěchowanje za tele lěto zapodać.
Běłowodźanskim towarstwam přewostaji LEAG lětsa 80 000 eurow. Zakład je w lěće 2011 wotzamknjene zrěčenje z městom. „Prěnjorjadnje spěchujemy dźěło towarstwow, dokelž wone ze swojim skutkowanjom k žiwjenskej kwaliće w Běłej Wodźe přinošuja“, rjekny rěčnica LEAG Kathi Gerstner. Kelko pjenjez energijowy koncern w lěće 2022 a pozdźišo přewostaji, njeje dotal jasne.
Zajim towarstwow za spěchowanske srědki je kóžde lěto jara wulki. Jeničce loni zapodachu towarstwa próstwy wo spěchowanje w cyłkownym wobjimje 184 000 eurow. Rozdźělić pak móžachu „jenož“ 80 000 eurow. W minjenych lětach bě spěchowanski hornc wo wjele wjetši. W prěnich lětach dósta Běła Woda hač do miliona eurow. 2017 bě to hišće 360 000 eurow, lěto pozdźišo 200 000 eurow a 2019 dohromady 100 000 eurow.
