Wojerecy (SiR/SN). Zajimawy projekt, wožiwić Wojerowske stare město, je nětko njejapcy zwrěšćił. Twarjenje Stareho pósta na Friedrichowej trjeba mějićel nětko tola za swójske zaměry. Tohodla dyrbješe iniciator Christian Völker tele dny z wutworjeneho „kulturneho woknješka“ wućahnyć.
Nastał bě projekt lěta 2019 w zwisku ze staroměšćanskim bulwarom. Tehdy běchu namołwjeli, historisce zajimawe městna ze žiwjenjom pjelnić. To chcyše Christian Völker na Starym pósće činić, wšako bydleše tam něhdy swójba Konrada Zusy. Z pomocu partnerow a sponsorow rumnosć wutwarichu a přewjedźechu w nich hrajne wječory, přednoški, hudźbne zarjadowanja, dźěłarnički a wjele dalšeho. Druheho lockdowna dla pak dyrbjachu loni w nowembru druhi raz začinić.
