Chrósćicy (SN/MiR). W Chrósćicach chce mějićel swoju ležownosć předać zajimcej, kiž chce tam twarić. Gmejnska rada dyrbješe k naprašowanju za twarske předewzaće (Bauvoranfrage), kotrež hižo pola wokrjesa předleži, stejišćo podać. Dosć mała ležownosć je na kromje wsy do směra na Staru Cyhelnicu. Na třiróžkatej płoninje ma jednore domske nastać. Nětko jewi so prašenje, hač dyrbja za to wjesnu taflu přestajić a štó to zapłaći. Wjesnjanosta Marko Kliman (CDU) zdźěli, zo, dyrbjeli-li wjesnu taflu přestajić, to wokrjes wukonja a zapłaći. Tak gmejnje žane kóšty njenastanu.

Za 800. róčnicu prěnjeho naspomnjenja Chrósćic a Prawoćic, kotraž budźe za štyri lěta, je Chróšćanski wjesnjanosta Marko Kliman připowědźił, zo maja so wutworić wšelake dźěłowe skupiny. Wobdźělić měli so na nich třo do štyrjo čłonojo gmejnskeje kaž tež wosadneje rady a dalši zajimcy. Skupiny maja po dorěčenju z wosadnym fararjom Měrćinom Deleńkom ideje a namjety zběrać, kak hodźi so jubilej woswjećić.