W skale so mjez sobu zeznać a sej kulinariske dobroty zesłodźeć dać

Sćenjow (SN/MiR). Na štomach zrawja tuchwilu mnohe płody. Runje mamy sezonu wišni. Při pućach a na łukach widźiš tu a tam ludźi, kotřiž sej při pućach słódne płody z hałuzow šćipaja.

Zo bychu wosebje stare družiny sadowcow zachowane wostali, wo to stara so wobydlerska iniciatiwa Łužiscy přećeljo za sadowcowe łuki (Streuobstwiese). Wona chce w regionje biotopy jako refugij tu zasydlenych zwěrjatow a rostlin zachować, chce jim dobre žiwjenske wuměnjenja tworić, je hladać a produkty z plahowanja wužiwać.