Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často pak maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa hosćenc „Zur Grafschaft“ w Nowej Wsy pola Kulowa. (10)

Dwaj kilometraj sewjerozapadnje Kulowa nad Čornym Halštrowom je sydlišćo, kotrež bu runja někotrym dalšim w našej kónčinje prosće jako ta „nowa“ wjes pomjenowana. K rozeznawanju wot tamnych přidachu jemu atribut „klóšterska“, dokelž słušeše sydlenski rum za čas załoženja klóštrej Marijinej hwězdźe. Do toho pak bě to swójstwo Kamjenskeho hrabinstwa. Čłowjek móhł sej myslić, zo pokazuje na to pomjenowanje nahladneho noweho hosćenca „Zur Grafschaft“ we wjesce z lědma 70 wobydlerjemi. Tomu pak tak njeje, přetož zapřijeće ma swoje korjenje w swójbnym mjenje.