Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa Njeswačanski „Knježi hosćenc“. (12)
Před wosom lětami přewza David Härtel w Njeswačidle hosćenc a pensiju „Knježi dwór“. Wón pochadźa z Młynkec korčmarskeje swójby w Hórkach – Beno a Kätha Młynkec staj jeho dźěd a wowka. Po studiju hoteloweje ekonomije bě za njeho samozrozumliwe starać so wo derjeměće hosći. Tuž so wón jara wjeseleše, zo skićeše so tajka móžnosć w lěće 2013 w Njeswačidle z hosćencom, kotrehož stawizny sahaja wróćo do 18. lětstotka.
