Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajima­we stawizny. W swojej lětnjej seriji­ tajke gastronomiske předewzaća předstajamy, dźensa Budyski hosćenc „Zum Haseneck“. (14)

Wosrjedź Budyšina, na róžku, hdźež wot Kamjentneje na Kurta Pchalekowu wotbočiš, napadnje hosćenc „Zum Hasen­eck“. Kak je k pomjenowanju renomě­rowa­neho lokala dóšło, je zajimawa odyseja do zašłosće. Znate je, zo steješe tam hižo w pózdnim srjedźowěku korčma. Na pohladnicy z kónca 19. lětstotka, kotruž­ dźensa w hosćencu wuhladaš, je wi­dźeć jednory płony twar z korčmu z napisom „Gambrinus“. Pomjenowanje poćahuje so na legendarneho nižozemskeho krala, kotryž drje bě wunamakar mjeztym daloko a šěroko znateho napoja, mjenujcy piwa.