Maćicarja Jana Bohuwěra Mučinka wopominali

Zemicy-Tumicy (LTh/SN). Składnostnje 200. narodnin wučenca Jana Bohuwěra Mučinka (1821–1904) bě njesměrnje hibićiwy maćicar a čłon Budyskeho župneho předsydstwa Jurij Łušćanski hižo před lětomaj z tehdyšej wjesnjanostku Zemic-Tumic Giselu Pallas a dalšimi zwisk nawjazał, zo by róčnicu přihotował. Tak wón Němcam w Zemicach-Tumicach – wjes je něhdźe 15 kilometrow wot Budyšina zdalena – poněčim a kedźbliwje serbske stawizny zbliži, wědźo, zo na jich kěrchowje hižo dołho row wučerja a pčołarja Mučinka hladaja. Tola wo jeho skutkowanju za serbske politiske a narodne wozrodźenje a za serbsku wuměłsku prozu po zdaću tehdy wot Jurja Łušćanskeho prěni raz zhonichu.