We Wojerecach su minjeny kónc tydźenja na namóc přećiwo ­wukrajnikam w lěće 1991 dopominali ­a zdobom kulturnej ­tydźenjej Budy­skeho wokrjesa zahajili.

Wojerecy (AK/SN). Hida cuzym napřećo a prawicarska namóc lěta 1991 we Wojerecach wostanje dźěl stawiznow města. Wona je napominanje, znamjo politiskeho postajowanja zdaloka kaž tež politiskich wuskutkow. To podšmórny direktor Sakskeje krajneje centrale za politiske kubłanje dr. Roland Löffler w přednošku k zahajenju wopominanskeho kónca tydźenja „Wojerecy 1991: Dopomnjenki – Dohlady – Perspektiwy“, z kotrymž za­hajichu zdobom interkulturnej tydźenjej Budyskeho wokrjesa, minjeny pjatk we Wojerowskej Łužiskej hali.

Z forumami ze swědkami časa, z fo­towej wustajeńcu „Běchmy kolegojo“ a z kritiskim historiskim wobchodźenjom města wot dwórnišća k Łužiskemu naměstu kaž tež z wopominanskimi kemšemi a čitanjom dopominachu we Wojerecach na njelubozne podawki před 30 lětami. Prěni raz zetkachu so we łužiskim měsće zastupnicy wot prawicarskeje namocy w lětach 1991 do 1993 potrjechenych městow Wojerec, Rostocka, Möllna a Solingena.